ربا مینوں ڈنگر بنا کے
ظالم بندیاں دے وَس پا کے
جِنہاں دا ہاں بھار میں چُکدا
ڈِگ، ڈیہہ کے تھک ہار میں چُکدا
نسل وی میری ایہناں جوگی
پالن، ویچن اساں ابھوگی
دُدھ وی دَیواں، ماس وی دَیواں
خُشی تے نچ نچ ہاس وی دَیواں
دو ویلے دا چارہ دے کے
جو ایہہ چاھون کرنا پیندا
ایہناں وانگ ای ڈھیڈ اے ساڈا
جِس نوں سانوں بَھرنا پیندا
بھوکا ڈھیڈ بَھرن لئی مولا
ڈنگر ساں چَرن لئی مولا
کل کسے دی پَیلی چَر لئی
چَر کے میں خطا جیہی کر لئی
دو بُک سبزہ کھاوَن پاروں
وانگ قصائی مینوں وڈیا
پَیلی دے مالک نے میری
جوڑ توں لت نوں وَکھ کر چھڈیا
اوہ پَیلی دا مالک سی پر
تُوں تے مالک ہیں نا جَگ دا
ربا اپنا آپ ویکھا دے ...
ویکھ لے اکھیں پانی وگدا
(طارق اقبال حاوی)
