تک لَے یار وچھوڑیاں دے ماریاں نوں
تیرے لٸی اپنا سب کُجھ ہاریاں نوں
_______
ٹُٹیاں آساں کَینہہ جینا بِن تیرے
تیرے باہجوں ہر پاسے نیں ہنیرے
کِنّہے گل لانا دُکھی ونجاریاں نوں
تک لے یار وچھوڑیاں دے ماریاں نوں
____________
تُوں نظر نہ آویں تے میرا دل ڈُبدا
ہنجواں دا پانی اکھیاں چوں نہیں سُکدا
اگ وچ پاواں محل مناریاں نوں
تک لے یار وچھوڑیاں دے ماریاں نوں
_________
ہُن تے آ جا جان بدن وچوں جاوے
تیرے باہجوں روندی کون چپ کراوے
واسطہ ای بند کر دے ہن لاریاں نوں
تک لے یار وچھوڑیاں دے ماریاں نوں
_______
(راحیل احمد جہانگیر)
No comments:
Post a Comment